Doneztebe, Elgorriaga eta Sunbilla herrien artean Axkingo maldak goratzen dira, Mendaur erraldoiak ekialderantz luzatzen duen adar malkartsuaren azken muturrean. Seguruenik gailurretik hurbil dagoen antena da mendi honen ezaugarri nagusia, baina Axkinek badu zer eskaini mendizaleari: Baztan-Malerrekako mendien gaineko ikuspegi apartaz gain, trikuharriak, baso ederrak, Onddoaren bidea... Arrazoi nahikoak bisita baterako.