Leitzarango ibarra eta Villabona artean kokatzen da Oindolar eta mendiak ibiltarientzako berreskuratzeko adibide egokia izan daiteke. Duela urte batzuk insignis pinudi zatar batek estaltzen zuen gainaldea orain larre eremu zabal eta garbia da, mendizaleen ibilbideen saretik erraz heltzeko moduan dago eta bertan dagoen trikuharri multzoa txukundu eta nabarmenduta gelditu da. Tontorrean erpin geodesiko bat eta mendiaren izena jasotzen duen esola bat aurkituko duzue.

A-15 autobideak zeharkatzen du tunel batez bere Hegoaldeko hegia, eta Ameraungo kanalak ebakitzen du Ekialdekoa, "milla eskilaratan" behera jaisten den hodian sartuta Leitzaran errekara itzultzeko, hainbat kilometroko ibilbidea egin eta gero (PR-GI 161 eta PR-GI 118 bideek jarraitzen du tarte luze batean kanal hau).