Zugarramurdi eta Urdazubi artean gailur malkartsuen mendialde bat zabaltzen da, bi herrion arteko errepideak Urbia mendatean hausten duena. Aizparatz gainak (544m), bere izenari (haitz + baratze) ohore egiten dio, gainaldeko harritza batzuetan deserosoa egiten baita.
Mendatearen mendebaldean dauden gainek (Artxuria, Mendibil, eta abar) bisita ugari jasotzen dituzten bitartean, ekialdeko mendiek itxura bakartiagoa dute, eta batzuetan, Arleungo edo Etxeteko harrietan bezala, zaila eta neketsua da gailurretara iristea bideak itxita baitaude. Baina, ohi bezala, bisitak merezi izanen du, gailurretarik miretsiko ditugun paisaiak eta bakardade sentipenak neke guztiak ahanztaraziko dizkigute.