Larrandain bezala, basoak estaltzen du erabat Deskarga mendia ere, bere isurialdi guztietan, eta ez dago, beraz, zer ikusi handirik tontorretik. Gain aldea zabala eta berdina da, ez da erraza lekurik garaiena zein den asmatzen, baina bada norbait hautua egin duena eta harri pila batekin seinalatu du.

Basoaren azpia nahiko garbia da, Larrandainen ez bezala, eta trabarik gabe egin daiteke igoera zuzenean Urdausulbiko lepotik gora nahiz hegoaldeko bizkarrean gora.