Urkietatik oso gertu dago (500 m.), gora-behera oso txikia da bien artean eta garaieran ere metro gutxiko aldea dago, baina badu bere txartelontzi propioa, eta horregatik ekarri dugu hona. Aldapa handia da Araitz aldean, hegoaldeko isurialdean, eta baita iparraldean ere, Urdanzarrateko leporaino; harek lotzen du Musaioko bizkarrera. Lepo honetatik igotzen da Pagoeta tontorrera bidezidor nabarmenena. Aipatutako Musaio eta, batez ere, Urkieta dira ibilbide berean lotzeko tontorrik egokienak. Gain aldeko paisaia nahiko irekia da, han-hemenka sakabanatutako pago eta elorri batzuk apaintzen duten larre eremu batek osatzen du, ertz batzutan azaleratutako karaitz zuriarekin batera. Bada txartelontzi dizdiratsu bat tontorrean.