Arruazu, Uharte Arakil eta Aralarko herri lurren eremua elkartzen dira bertan; harri zurizko harresiek zedarritzen dute alde bakoitzari dagokion eremua. Baina tontorra bera eratzen duen izen bereko trikuharri galanta da aipagarriena, nahiko egoera onean dagoena, eta baita bere hegoaldeko hegian barrena sakabanatuta dauden besteak: handiak eta nabarmenak dira, ikusi beharrekoak Aralarko ondarea ezagutu nahi izanez gero. Tontorra bera Baraibartik San Migelera igotzen den errepidetik oso gertu gelditzen da, minutu gutxitan heldu zaitezke bertara izerdirik batere isuri gabe. Paisaia nahiko irekia da gainaldean eta hegoaldeko isurialdean, eta ederra! pagadi eta larre harritsuek eratzen dute gehien bat, han-hemenka sakabanatutako elorriekin apainduta, eta ibilbidea luzatzeko aitzakiarik ez da falta: trikuharriez gain Artxueta, San Migel santutegia eta Saldisgain gaina gertu gelditzen dira. Guardetxeko aparkalekutik abiatuz gero, berriz, erraza da trikuharrien bilduma handitzea, guardetxearen inguruan bai baita beste sorta eder bat.