Txikia gelditzen da Ezkaurre handiaren aldamenean, baina Ezkaurreko Argibiela aldeko igoera gogaikarriaren ondoren hark eskaintzen ez duena ematen du, igoera zirarragarria eta Ezkaurre beraren gaineko ikuspegi zabal eta ederra. Ezkaurrera igotzen den bide-arrasto nabarmenetik bidezidor xume bat bereizten da bien arteko lepoan eta pagadiaren itzalean barrena gerturatzen da haitzaren oinera. Lepotik tontorrera 50 m. inguruko gora-behera besterik ez dago, baina erne! estropezurik egin gabe igo beharreko 50 m. dira, amildegia handia baita ezker nahiz eskubi aldera. Bidezidorrak bizkarraren ertzetik gora egiten du ibiltariek haitzean aukeratutako koskak edo lurrean zulatutako mailatan gora, tarteka eskuen laguntza eskatuz. Gainaldea altuera beretsuko gandor luze, estu eta zorabiagarria da, ez da bertigoa dutenentzako leku aproposa. Ez da txartelontzi edo beste seinalerik, harripila xume bat baino ez gandorraren ekialdeko muturrean.