San Martin eta Txaparro ibilbidea

Eneritz herriko plazatik hegoalderantz hasten den pista hartu eta ezkerraldean txalet eta etxalde batzuk utzita, gorantz hasiko gara. Luze gabe Santo Domingoko baseliza dagoen lepora iritsiko gara. Metro batzuk aurrerago, hego-ekialderantz igotzen den lurrezko pista hartu eta berehala bi gainen arteko lepoan izanen gara. San Martinera igotzeko ezkerraldeko pista hartu eta igotzen hasiko gara. Gailurra inguratzen duen pinudian gurutzebideko gurutzeak ikusiko ditugu. Gailurreko baseliza handia miretsita, lepora itzuli eta kontrako hegian gora hasiko gara. Lurrezko pista goraino eramanen gaitu. Bertan, zuhaixkek ia irentsita, erpin geodesikoa aurkituko dugu. Eguraldi kaskarra zela eta, gu etorritako bidetik jaitsi ginen, baina aukera dago mendebalderantz jarraitu eta alor bat zeharkatuta Santo Domingoko baselizaraino eramanen gaituen pista hartzeko.