Gipuzkoa eta Nafarroa arteko muga-lerroari eusten dio parez-pare daukan Oregigañarekin batera eta, ondorioz, hura bezala, mugarriz ondo hornituta dago. Pagadiak estaltzen ditu bere hegi gehienak, HEko eremu bat salbu. Eremu horretan iraganean artzaintzak eratutako paisaia ederraz gozatu daiteke: larreak, han-hemenka sakabanatutako pagoak, borda batzuren aurriak, harresiak, itxiturak... Gain aldeko paisaian muino harritsu batzuk nabarmentzen dira, horietako batzuk amildegiaz ebakita iparraldera, Enirio aldetik. Ez da inon txartelontzirik ageri, baina aipatutako muino horietan amildegitik bereizita gelditzen den horretan harripila xume bat ikus daiteke, altueran metroren bat edo beste gehiago delako-edo, nahiz eta altuera beretsukoak izan denak. Nolanahi inguru zakar xamarra da, ez da oin-arrasto handirik nabari inguruan eta asmatu beharra dago bertaratzeko bidea.