Larrun eta Ibardin lepoaren arteko mendialdea zabala eta interesgarria izanik ere, ez da oso ezaguna mendizaleen artean. Nabaria da hori zenbait bidetan, ez erabiltzearen poderioz ixten ari baitira. Beratik iparraldera abiatuta, Altzatelarre da aukituko dugun lehen gaina. Honen gailurrean usategi bat dagoenez, ez dugu zailtasunik izanen haraino iristeko, non eta ehiza garaitik kanpo gauden. Txangoa jarraitu eta Zumaleku lepo zabaletik beste bi gain begiztatuko ditugu: Mugerriko Gainaren (400m) bizkar belartsua, eta apalxeagoa baina askoz ere erakargarriagoa den Lizarnabarra (366m). Bien arteko Ardizoko lepotik, azken honek emanen dizkigu lan gehien, erran bezala sasiak hazi eta kontuz ibili beharko dugu bidea ez galtzeko. Gailurra izeien artean badago ere, erraz aurkituko dugu modua hego eta ekialdeko harkaitz ikusgarrietara iristeko.