Bada Aralarko mendebaldeko larre eremu luzeetan Alotza izeneko goi-bailara bat mendi zerrenda batek ixten duena hegoaldetik, Kilixketa izeneko muino harritsutik hasi eta Uarrain tontorrean goia jotzen duena. Ibilaldi berean zeharkatu daiteke kate osoa, beste hainbat tontor bisitatuz, eta gero, aski izan ezean, Ganboa nahiz Pardarri aldera jo daiteke ibilbidea luzatzeko. Bada Kilixketaren aldamenean beste muino harritsu apalago bat txartelontzi propioa duena: Saltarrimendi izenarekin aipatzen da OSMn. Zailtasunik gabeko mendiak dira denak, soilak, ikuspegi zabalekoak. Mendiaren iparraldeko isurialdean Saltarriko ordeka dago eta zutarri aipagarri bat ere bai bertan, bisitatu beharrekoa inguruan ibiliz gero.