Mendi xume baina ederra dugu Peña Blanca, Andia mendilerroko bihotz-bihotzean kokatua. Badirudi bere auzokoak diren Treku (Bordas Viejas) eta Lezizagoak erakartzen dituztela mendizale gehienak, baina Peña Blanca aukera bikaina da, bai bera bakarrik igotzeko, bai Trekura egindako txangoak luzatzeko, eta ikuspegi berri eta ederragoak gozatzeko.

Igoerak anitz eta desberdinak dira: Goñi herritik -edo baselizatik-, Lizarragako mendatetik, baita Unanutik igotzen den pistatik ere, azken hau luzeagoa bada ere. Dorraoko San Pedroko baselizatik ere abiatzen da bide interesgarri bat, Eskalaborroko harrien parean irabazten duena mendilerroaren gainaldea. Inguruko parajeak ezin ederragoak dira, belardiak, ur putzuak, kareharrizko hormak... Merezi du bisitatzeak.