Pallardi eta Irumugarrieta artean gehien nabarmentzen diren tontorrak bilatzen hasiz gero, bi dira bereziki nagusitzen direnak: Mendiaundi eta Kurutzeaga. Biak altuera berekoak dira, baina ez dute elkarren antza handirik. Mendiaundi barrualdean dago, Malloetako burkailetatik aparte, eta gain zabala du, harri zerrenda batzuekin atonduta, eta hegi leunak bere isurialde guztietan. Kurutzeaga berriz Malloak osatzen dituzten burkailetako bat da eta hegi malkartsuak ditu tontorraren inguruan, Iparraldera begira batez ere. Batere zailtasunik gabe heldu daiteke halere hegoaldeko bizkarrean gora, haitz multzo batez osatutako gainera. Bere izena ez da bestearena bezain segurua, ez da mapa guztietan izen horrekin ageri (Imanol Goikoetxearen mapatik jaso dut nik).

Biderik errazena bilatu nahi izanez gero, Albiko aparkalekuetatik abiatzea da egokiena, Beloki eta Ttutturre arteko lepotik pasata. Irumugarrieta nahiko eskura gelditzen da, gorabehera handirik gabe, Mendebaldean.