Mendixuriko harrizko piramideak alde batetik eta Adi erraldoiak bestetik itzala egiten diete inguruko gainei: belarrez estalitako bizkar borobilak dira, elkarren antzekoak denak, zozoegiak zenbait mendizaleren ustez. Baina Sorogain eta Mendixuriren artean hainbat eta hainbat mendi interesgarri aurkituko ditugu, paisaia ezin zabalagoak eskaintzen dituztenak, eta adi ibiliz gero, hainbat monumentu megalitikoren altxorra eskura jarriko digutenak: Mendiaundi, Txasperro, Lanotegi, Lupuzuri... haietan barrena paseatzeak gozagarri hutsa da.