Gehienean pinudiz inguratutako mendia izan arren suebaki zabal batek mendi honen alderdirik ikusgarrienak gozatzeko aukera ematen digu: Usabelartzako zohikaztegia, Muntto aldeko bizkar harkaiztsua eta gailurraren inguruak. Hareharri gorri eta pundingaz eratutako harkaitz horiek atontzen dute paisaia, han-hemenka sakabanatutako gorostiz apainduta. Badira harkaitz horietan eskaladarako egokitutako hainbat horma. Tontorrean erpin geodesikoa eta, handik 100 bat metrora, bi txartelontzi zahar topatuko ditugu, beste suebaki batek zabaldutako pasarte zabal batean. Onddo eta Muntto gertu gelditzen dira ibilbidea osatu nahi izanez gero, eta baita hainbat monumentu megalitiko ere, Usobelartza zutarria horien artean.