Lokiz mendilerroa, Nafarroako mendimultzorik handienetakoa izanik ere, nahiko ezezaguna da. Ekialdeko malkarrak, Allin gainean amiltzen direnak, eta Lana ibarreko gainak dira mendizaleek bisitatzen dituzten bakarrak... eta seguruenik ez oso maiz.
Antzin gaineko mendialdeak Peñas de la Miel omen du izena, eta Mendandia da harri horietako bat. Mediterranear erako baso itxi batek defendatzen du gaina, eta kontuz ibili behar da bideak eta xendrak ez galtzeko.
Gailurretik bertatik ez dugu paisaia handirik ikusiko, baina beheragoko malkarrek ikuspegi interesgarriak eskainiko dizkigute.