Alanoetan amaitzen den mendikate luze bateko hegoaldeko muturra da Punta d’o Trueno, Bintze (Biniés) herriaren gainean. Ikuspegi zabala eskaintzen du bere gain irekiari esker, bai oraindik urrutitxo gelditzen den Pirinioko mendebaldeko mendi handietara begiratuz gero eta baita Canal de Berdun aldeko ordokien gainean. Tontorrean erpin geodesiko bat dauka, ezpelak apaindutako larre eremu zabal baten izkinean. Bada bide nahiko egokia Bintze aldetik igotzen dena, hegoaldeko hegian gora. Iparraldeko isurialdea Veral ibaira jaisten da hainbat malkarretan jauzi eginez. Alde hartan topatuko duzue "Ruta del Santo Grial" izeneko bidea, ibilbidea osatzeko nahiko egoki. Udaberrian igotzeko egokia.