Labiako azken gainetako bat dugu Ezpilaga. Inguruko mendi gehienen antzera, pinudi sarriek estalita dago, eta inguruan abere eta ehiztaririk ibiltzen ez direnez, bide askorik ez dugu aurkituko, eta pistak erabili beharko ditugu gailurretara hurbiltzeko. Antzeko altuerako hiru gailur ditu Ezpilagak. Hegoaldeko biak basoaren baitan daude, baina altuena, iparraldekoa, ez du zuhaitzik eta zabalik dago hegoalderantz, paisaia nahiko zabalak eskainiz. Txangoa luzatu nahi izanez gero, Izkieta mendia hurbil dugu, bere erpin geodesikoarekin.