Mururekin batera, Ugarrongo harroila mendebaldetik mugatzen duen mendietako bat dugu Ugarron. Ez dirudi mendizaleak inguru hauetatik asko ibiltzen direnik, baina hala ere bideak egoera onean daude, eta gailurren azken metroetan izan ezik, igoerak politak eta garbiak dira. Txangoak luzatu nahi izanez gero, aipaturiko Muruz gain, Chaparral eta Barrancos mendixkak eskura izanen ditugu, Ugarrondik hegoaldean.

Izen bereko trikuharriaren aztarnak gailurraren ekialdean daude, gandorreko basoan erdi ezkutaturik, baina gailurrean bide markatu bat aurkitu genuen, norabide hartan urruntzen zela ematen zuena. Esploratzea merezi duen lurralde bat da.