Eginoko haitzak Burundako azken herrien iparraldean zabaltzen dira, paisaia latza marraztuz Iruñea eta Gasteiz arteko autobidearen gainean. Harri ugaritasun horrek harrobiak eta porlan lantegi erraldoiak ekarri ditu, lanaren mesedetan seguruenik, baina mendien kaltetan.
Beorkolarre ez da oso mendi ikusgarria, zuhaitzek hartutako tontorretik ezer gutxi ikusiko dugu, baina polita da pagadi garbietan barrena ibiltzea gain honetaraino. Gainera, pixka bat ekialderago, Gobazpi edo Aitzkibel haitza dugu, txangoak falta zuen zirrara punttua emateko.