Elke menditik hegoaldera, mendikateak altuera galtzen du, eta garaierarekin batera, interesa ere gutxitzen zaiola erranen luke baten batek. Izan ere, gain hauek apalak, landaretza deserosoz estaliak, eta paisaia murritzekoak ematen dute.

Artziko Santa Mariatik abiatzen den pistak Muniaingo mendatean jarriko gaitu pare bat bueltatan. Hortik hegoalderantz, lehen Arizgorri gain txikia eta pistan aurrera, Lamariko gaina aurkituko dugu. Pistatik desbideratu eta azken zatia batzuetan desagertzeko mehatxua egiten duen bidezidor batetik eginen dugu. Gailurra irekia da, ezpelez josita, baina erosoa. Hortik hegoalderantz, Eskisun gaina eta Otsa herri despopulatura iritsi gaitezke pista hartuta.