Azken urte hauetan Amaiur herria famatu duen gazteluaren hondakinak hasiak dira argia ikusten, sinbolikotzat har daitekeen pizkunde batean. Bertan, 1521an, berrehunen bat nafarrek aurre egin zioten Gaztelako armadari, hamar bat mila soldaduk osatua. Han amaitu zen Nafarroaren independentzia. Paseoa hondakin goibel horietatik haratago luzatu nahi izanez gero, hortxe izanen dugu Antzabalgo bizkarra, talaia xumea Baztango ibarraren gainean.