Leitzako ortzemuga iparraldetik ixten duen katea Arramiako gain konikoan hasi eta Eguzkiko muinoan iristen du punturik garaien, mendebaldeko muturrean, Usategietako mendatearen gainean.
Kate luze honetako gainak leunak dira, eta Arramia kenduta, gailur soilak dituzte, larre gozoz estalita. Pagadia Leitzalarreako bazterretatik igo eta gainaldean azaltzen da, baina hegoalderantzko paisaiak zabalik uzten ditu.
Errepetidore batek itsusten du apur bat Baztarla edo Baztarrola gaina. Haraino daraman pista zabalak ere autoak ekartzen ditu gain honetara. Hala ere, bazter hauen edertasuna aparta da. Txangoa luzatu nahi izanez gero, hortxe ditugu Biuztaingo gaina (903m), Leitzalarrearen gaineko panoramika eskaintzen duena, eta Arramia (863m), biak ala biak monumentu megalitiko ugariz inguratuak.
M.Belaskoren hiztegian, mendiaren etimologiaz gain (Bazter+ola), Patziku Perurenak jasotako kondaira bat irakurtzen dugu. Baztarla gainetik hurbil Neskanpagoa omen zegoen, Leitzako neskazahar indartsu batek lurrera botatako zuhaitza, mutil batekin ezkontzearren. Leitzakoak, beti indartsu.