Malloetako gailur harritsuen hegoaldetik, eta haien paraleloan, beste bizkar leunago eta apalago bat hedatzen da mendebaldetik ekialderantz. Bizkar honek Errenagako gainetan hasi, Txameni-Txorrotxeta gandorretan laztu eta Beloki gainetan goititzen da berriz, Guardetxeko errepidean hil aurretik.
Desaomendi (edo Desamendi) dugu bizkar honen mendirik altuena. Hau eta haren gainalde lau belartsutik izanen dugun ikusmira aparta dira mendi honen dohainik onenak.
Bai Lizarrustiko mendatetik bai Guardetxetik abiaturik txango ederrak egin daitezke gain honetara, bai bakarrean bai inguruko gainekin (Putterri, Txameni, Ernara, etab.) konbinatuz.