Uitzi mendatetik Ireberrera igoera

Jose-k sortua, 2007, maiatza 21 - 00:27
Ibilbide mota Joan-etorria bide beretik
Zailtasuna Zailtasun gutxikoa
Lurraldea Nafarroa
ABIAPUNTUA Utzi mendatea
Eskema Uitzi mendatea - Oringo iturria - Launtzeko lepoa - Ireber
Lotuta »Ireber (mendi)
Gora-behera450 m
Luzera13.2 Km
Iraupena4:00 - 5:00
Alert

Guk ezin dugu ziurtatu ibilbide hau zuretzako egokia denik, ez eta zuzen azalduta dagoenik ere, arduraz jokatu ezazu. Ibilbide hau egiten baduzu, esaiguzu mesedez egokia den ala ez, zer zailtasun topatu dituzun, zein zuzenketa egingo zenituzkeen e.a. oharra jarraian erantsiz

Uitzi mendatea Ireberrera igotzeko abiapuntu egokia da. Bide luze xamarra baina gora-behera txikikoa eskaintzen du. Ibilbidearen lehenengo zatian pagoz estalitako mendi-bizkar luzexka bat jarraituko dugu Ireberrera gerturatzeko, eta bigarren zatian basoa eta larreak tartekatuz Ireberreko kasko harritsua bilatuko dugu inguruko tontor apalagoen artean.

Ibilaldiaren lehenengo zatia Uitzi mendatetik (811 m.) ekialderantz luzatzen den mendi-bizkarretik egingo dugu. Horretarako, mendatearen gainetik bertatik abiatzen den bidea hartuko dugu. Hasieran hegoalderantz egiten du bide honek, baina laster ekialde-ipar-ekialde norabidea hartu eta mendilerroari jarraituko dio poliki-poliki altuera irabaziz, gehienetan mendigaina baino zertxobait beherago iparraldeko isurialdean, ia beti pagadian zehar, Beruetetik igotzen den errepidera iritsi arte (1011 m.; 1h10’).

Errepidetik ezkerrerantz metro batzuk ibiliz gero Oringo iturria aurkituko dugu. Iturritik errepidera iritsi garen puntura itzuli, eta errepidea gurutzatuko dugu aurrez aurre dugun malda igotzen hasteko. Bidezidorrak eskuinerantz eramango gaitu. Zertxobait aurrerago hesi bat gainditu eta zelai eremu zabal batetara irtengo gara. Ipar-mendebaldetik datorren bide bati elkartuko gatzaizkio eta hego-ekialderantz jarraituko dugu, zelai eremua zeharkatu eta basoan sartuz.

Bailara txiki baten barrenera iristean, basotik irten eta zuzen gora egingo dugu. Larre aldapatsua igo eta Launtzeko lepora iritsiko gara (1172 m.). Bi Aizpen Sepulture izena duen trikuharri bat dago lepo honetan.

Hegoalderantz doan bidezidorraren bitartez baso tarte labur bat zeharkatu eta Ireberren harrizko kaskoa aurrez aurre topatuko dugu. Azkeneko aldapa igo eta tontorrera iritsiko gara (1204 m.; 2h5’).