Garralda herriaren iparraldean mendialde zabal bat hedatzen da. Gainaldea laua eta soro eta larrek hartuta badago ere, malkar ikusgarriak amiltzen dira inguruko ibarren gainera: Erodoa, Arregia, Aitza...
Ikusgarrienen artean Bultzarregi dugu. Aribe eta Orbara arteko errepidetik itxura beldurgarria dute Bultzarregiko harriek, baso trinkoaren artean ateratzen direnak. Agian dezepzio txiki bat hartuko dugu Bultzarregiko bi gailurretara iritsita: basoan daude eta inolako ikuspegirik ez dute eskaintzen. Txangoa beraz, inguruko gain batzuetaraino luza genezake: Zelai (1031m), Okelamein (1030m), Zurtzeta (1022) edo Erodoa bera (1046m), paraje hauetako lasaitasunaz gozatuz.