Arthanolatze

Harsüdürra Pirinioen ardatz nagusitik bereizturiko mendilerroa da. Burdinkurutzetako lepoak mendebaldean eta Bagargiak eta Iratzabaleta lepoak ekialdean mugatzen dute mendilerro honen atal nagusia. Hegoaldetik ikusita, bizkar belastsu eta borobil samarrak dira, baina iparraldeo isurialdea -Mendibeltza izenekoa- ehunka metroko malkar ikusgarrietan hausten da Inartxuriko oihanaren gainean. Ugatze lepotik ekialderantz, mendikateak altuera galdu Mendikotziageko gandorrean barrena (Belozkarre, 1173m) eta Salteburia mendian amaitzen da, Larrañe gainean mazela erraldoi gorriskak amilduz.
Arthanolatze da mendilerroko gain altuena. Lepo Txipia eta Burkidoiko lepoak mugatzen dituzte bere hegi belartsuak.
GR10eko bidea izaten da erabiliena, Iratiko Txaletetik Lepo Txipira abiatzen baita. Ekialderago, Ugatzeko lepotik ere iristen ahal gara lepo berera. Are ederragoa da Ahuzkiko errepidetik abiatzen den bide zaharra. Iparraldeko malkarra dotore gainditzen du, baina badugu malkarretan eskalada erraza egiteko aukera ere. Burdinkurutzetako lepotik, bidexka batek Mendibeltza hegoaldetik inguratu eta Burkidoiko lepora iristen da, Txardeka gainatik igarota.