Arnostegiko lepoan hasi eta iparralderantz luzatzen den mendikateko gailur nagusietakoa dugu Leizateka. Donejakue bidea mendi honen ekialdeko saihetsetik igaro eta Bentarteko lepoaren bila igotzen da. Inguru hauetaz ari garelarik, ezinbestekoa izaten da Orreagako gudaldia aipatzea, euskaldunek Europako armadarik indartsuenetako bat garaitu zuten borroka mitikoa.
Igoera gehienak (Iparraldetik, Azpegitik, Ibañetatik) luze samarrak izaten dira, baina gailur garbi honetatik izanen ditugun paisaiek gozatuko digute nekea.