Urbasa eta Andia bereizten duen akatsaren inguruan hainbat bizkar luzatzen dira, ipartik hegorako norabidean. Azpala eta Planilla ditugu gain horietako batzuk, ez Dulantz edo Krezmendi bezain ezagunak baina interesgarriak ere beren bakardadean. Planilla bizkar harritsu eta soila dugu, izen bereko zutarria gordetzen duena gainaldean. Bizkar luzea dugu Azpala ere, baina pagadiak erabat estalita. Haien arteko sakanean, San Kristobali eskainitako baseliza txikia aurkituko dugu.